Isang makasaysayang tagumpay ang nakamit ng Pambansang Mataas na Paaralan ng Lungsod ng Heneral Santos nang masungkit nila ang ikalawang pwesto sa Best School Paper sa kategoryang Filipino sa National Schools Press Conference (NSPC) 2024 na ginanap sa Carcar, Cebu City.
Matapos ang mahabang panahon ng paghahanda, rebisyon, at pagsasanay, nagbunga rin ang lahat ng pagsisikap ng buong pahayagan ng paaralan. Bawat pahina ng kanilang pahayagan ay sumasalamin sa kasipagan at dedikasyon na kanilang inialay sa kompetisyon.
Tampok sa kanilang school paper ang mahusay na balita, malikhaing lathalain, matalas na editoryal, at kapana-panabik na sports writing, at ang buong parte ng school paper. Ang pagkaka-balanseng nilalaman at mataas na kalidad ng kanilang gawa ang naging daan upang mapansin sila sa pambansang antas.
Hindi naging madali ang proseso. Mula sa pagbuo ng mga ideya hanggang sa huling paglalapat ng layout, kinailangan ng tiyaga at pagsisikap upang maabot ang pamantayang hinihingi ng NSPC.
Ang tagumpay na ito ay hindi lamang nagbigay ng karangalan sa paaralan kundi nagsilbing inspirasyon sa iba pang mga mag-aaral na nagsisikap sa larangan ng campus journalism.
Sa kabila ng mga pagsubok, pinatunayan ng Pambansang Mataas na Paaralan ng Heneral Santos na kayang makipagsabayan at magtagumpay sa pinakamataas na antas ng kompetisyon sa pamamahayag.
Pag-uwi sa kanilang lungsod, dala nila hindi lamang ang tropeo kundi ang inspirasyong magpatuloy, magpursige, at magbahagi ng kanilang husay sa bawat pahina ng kasaysayan ng campus journalism.
Leave a Reply